Hyljås er ein kort og fin rundtur som startar ved Hyllandsfoss Camping og Hyttegrend, ca 2km frå Åmot sentum. Turen går hovudsakleg gjennom skogsterreng og passar godt for familiar og andre som ønskjer ein overkomeleg tur med flott utsikt undervegs.
Følg den raudmerka stien frå campingplassen. Turen har noko stigning, og enkelte parti går over berg, medan andre delar følgjer breiare sti og veg.
Om lag halvvegs i rundturen kjem du til eit utkikkspunkt med utsikt over Hylland, Hyllandshylen og mot Vehuskjerringa. På stille sommardagar kan fjella og kulturlandskapet spegle seg i vatnet. Her finn du også postkasse med trimbok i regi av Vinje IL.
Mot slutten av rundturen ligg ein gapahuk som er open for alle – ein fin stad for ein liten pause før turen går tilbake mot utgangspunktet.
Turen er om lag 1,5 km lang og tek rundt 45 minutt.
Perfekt for deg som bur i området
Hyljås passar særleg godt for deg som er gjest på Hyllandsfoss Camping og Hyttegrend eller Spegle, og ønskjer ein liten tur rett frå overnattingsstaden.
Ved Hyllandsfoss Camping ligg også badstoga Spegle. Kombiner gjerne turen med ein varm badstove og eit friskt bad i Hyllandshylen.
Ynskjer du ein lengre tur?
Hyljås kan enkelt kombinerast med fleire turvegar i området.
Du kan starte frå Groven Camping og Hyttegrend og følgje den merka turstien via Steimerre og Hyllandsfoss vidare til Hyljås. Det er også mogleg å starte frå Åmot sentrum og følgje gangvegen mot Hylland.
Turvegen over Steimerre går gjennom skogsterreng, og ved Ja-benken får du flott utsikt mot Hyllandsfossen og ein fin stad å ta ein pust i bakken.
