Følg stien langs Hyllandsfoss, der tømmerfløytarane ei gong arbeidde. Finn spor av historisk aktivitet, nyt bading i Kulpen og X-en – men ver varsam i elva, og vurder den lengre turstien til Hyljås for flott utsikt
Aktivitetsinformasjon
| Sesong: | Sommar |
| Aktivitetar: | Kultur, bading, tur |
Ta nokre steg tilbake i tid og følg i fotspora til tømmerfløytarane langs den historiske Fløtarvegen ved Hyllandsfoss. Her kan du utforske dei imponerande steinmurane som ei gong blei bygd for å leie tømmer ned elva då ho bruste over av liv. Aktivitetane langs elva har prega landskapet i hundrevis av år, og det er mest så du kan høyre ekkoet av tømmerfløytarane som ropa over elvebruset, smeden sine hamarslag, og jubelen då kraftverket laga straum til gardane på Hylland. Her finn du også spor etter møllene, der kornet blei male for å brødfø familiane i grenda.
Denne spennande ruta er om lag 1,2 km lang og kan enkelt kombinerast med andre nærliggjande turstiar. Ta gjerne med deg ei piknikkorg og badetøy! Kulpen langs elva har vore ei kjær badeperle i generasjonar. Dei lokale har brukt berghylla som springbrett til forfriskande dukkertar. X-en er ein annan populær badeplass ved elva, med ein karakteristisk, flat stein som er perfekt for piknik og avslapping. Ver merksam på at elva no er regulert, så straumen og vassmengda kan variere. Sjekk alltid forholda, og ver varsam!
Om du er i det eventyrlystne hjørnet og ynskjer å utforske meir, kan du gå om Hyljås før du vender heim. Denne vakre turstien, om lag 1,5 km lang, tek deg til eit imponerande utkikkspunkt med panoramautsikt over Hyllandshylen. Her kan du nyte synet av majestetiske Vehuskjerringa, som tronar i bakgrunnen med sine 1356 meter over havet.
Utforsk Fløtarvegen, nyt naturen og historia som omgjev deg, og ta deg tid til å lade opp langs elva. Vinje har mykje å by på!
