Det nærmar seg Litteraturdagane på Vinjesenteret 24.–27. september, og interessa for årets festival er stor. Festivalpassa er no utselde, men det er framleis enkeltbillettar att til alle programpostane.
Årets tema er «liding», og gjennom fire dagar blir temaet utforska med både alvor, humor, håp og nye perspektiv. På programmet står mellom anna forfattarmøte, føredrag, samtalar og konsertar med namn som Erlend Loe, Stein Torleif Bjella, Kari Stai, Gudmund Skjeldal, Tormod Haugland, Tønes og Ævestaden.
Eige program for små og store
Laurdag blir det også familieprogram på Vinjesenteret. Her blir det urframsyning av eit heilt nytt figurteater, laga av Adele Lærum Duus og basert på Jakob og Neikob og tidsmaskinen av Kari Stai.
Etter framsyninga blir det høgtlesing med Kari Stai, før borna kan sleppe laus teiknegleda på teikneverkstad.
Fredag kveld blir det konsert med Tønes, medan laurdagskvelden på Edland byr på utdeling av Storegutprisen og Ævestaden si nytolking av Nivelkinn. Festivalen blir avslutta med festivalgudsteneste i Vinje kyrkje sundag.
Tid: 24.–27. september 2026
Stad: Vinjesenteret og Edland
Festivalpassa er utselde, men det er framleis mogleg å kjøpe enkeltbillettar til dei ulike programpostane.
Sjå fullt program og kjøp billettar på Vinjesenteret si nettside.
