Vil du oppleve meir av den flotte naturen i Vinje? Denne sommaren og hausten kan du bli med på både Stolpejakta og Vinjetrimmen – to gratis aktivitetar som passar for alle, uansett alder og form.
Enten du er fastbuande, hytteeigar eller på besøk i Vinje, er dette ein fin måte å oppdage nye turmål og skape gode opplevingar saman med familie og vener.
Stolpejakta 2026
Frå 15. juni er årets Stolpejakt i gang. Rundt om i Vinje er det sett ut 54 stolpar, fordelt på både enkle nærturar og flotte rundløyper i heile kommunen.
Ved hjelp av Stolpejakta-appen eller kart registrerer du stolpane du finn. Kvar stolpe er merka med nummer, bokstav og QR-kode.
Nytt av året er Gullstolpen, som er plassert ut på utvalde stader i landet. Er du heldig og finn ein Gullstolpe, ventar det premie i næraste Sport1-butikk.
Tre av stolpane er også knytte til ABC for god psykisk helse, med ei oppmoding om å vere aktiv, gjere noko saman og skape gode opplevingar med andre.
Besøk minst 25 stolpar, så er du med i trekkinga av fem gåvekort på 1 000 kroner som kan nyttast hjå valfri verksemd i Vinje. Stolpane står ute til om lag 11. oktober, med atterhald om tidleg sno.
Vinjetrimmen 2026
Frå 1. juli til 31. oktober kan du delta i Vinjetrimmen gjennom appen Trimpoeng.
Vinjetrimmen er eit gratis lågterskeltilbod som skal inspirere fleire til å kome seg ut i naturen. Turane har ulik poengsum ut frå lengd og vanskegrad, og registrerer du 500 poeng eller meir, er du med i trekkinga av premiar.
Målet er enkelt – å gjere det lett å vere aktiv, oppleve naturen og kanskje finne nye favoritturar i Vinje.
Populære turmål
Både Stolpejakta og Vinjetrimmen tek deg til mange flotte område i kommunen. Nokre av dei mest populære turmåla er:
* Fløtarvegen i Åmot
* Fonnlinuten i Åmot
* Beverstien ved Raulandsakademiet
* Reinparken i Edland
* Uførnuten på Haukeli
* Hyljås i Åmot
* Fagersand på Rauland
* Urdbøuri i Arabygdi
Finn endå fleire turtips
På UT.no finn du eit stort utval av turar i Vinje med kart, rutebeskrivingar, lengd, tidsbruk og vanskegrad. Her på Visit Vinje finn du òg inspirasjon til både korte nærturar og flotte fjellturar, slik at det er enkelt å planleggje neste naturoppleving.
God tur – og lukke til med både stolpar og trimpoeng!
