På varme sommardagar finn du fleire fine stader for ein dukkert i og rundt Åmot. Her er nokre av våre tips til badeplassar i Vinje.
Ormetjønn
Midt i Åmot finn du Ormetjønn – ein familievenleg badeplass med sandstrand, leikeplass, flytebrygge og stupebrett. Her er det god plass til både leik, bading og avslapping, og vatnet blir ofte behageleg varmt på fine sommardagar.
Badeplassen kan gjerne kombinerast med den om lag 3 km lange rundturen rundt Ormetjønn.
Sandnes
Ved Sandnes finn du ei roleg badestrand ved Vinjevatn. Her er det god plass til å nyte sommardagen, med flott utsikt over vatnet og landskapet rundt.
Groven Camping
På Groven Camping ligg ein liten, barnevenleg badedam med brygger og gode bademoglegheiter. Badeplassen ligg inst på campingområdet og kan nyttast av både campinggjester og dagsbesøkande.
Ta gjerne kontakt med resepsjonen dersom du kjem som dagsgjest og treng informasjon om parkering og bruk av badeplassen.
Les meir om badedammen på Groven Camping.
Elvekulpar i Åmot
Langs elvane rundt Åmot finn du fleire naturlege kulpar som kan freiste med eit friskt bad på varme sommardagar. Etter fleire dagar med sol kan både berg og vatn bli overraskande varme.
Ver alltid varsam ved bading i elv. Delar av vassdraget er regulerte, og både straum og vassføring kan variere. Vurder forholda nøye før du går uti.
Badstoge ved Hyllandshylen
Vil du kombinere eit friskt bad med litt varme, finn du den vedfyrte badstoga Spegle ved Hyllandshylen. Badstoga står på ein historisk steinmur ute i vatnet, med moglegheit for ein dukkert rett utanfor døra.
Badstoga må bestillast på førehand.
