Badstoge, natur og historie ved Hyllandshylen
Hjå Spegle Hyllandsfoss i Åmot finn du ei heilt spesiell badstoge, plassert på ein historisk steinmur frå tømmerfløytinga i Vinje. Her møtest moderne arkitektur, lokal historie og natur i vakre omgjevnader ved Hyllandshylen.
Den stilreine badstoga speglar seg i vatnet og skogen rundt, med Hyllandsfossen og gamle steinmurar like i nærleiken.
Badstoga ligg om lag 2 km frå Åmot sentrum. Ei tilrettelagd trebru fører deg ut til badstoga, og her kan du kombinere varmen frå den vedfyrte omnen med eit friskt bad i Hyllandshylen.
Spegle er populær, så det er lurt å bestille på førehand dersom du vil sikre deg tid.
Eit besøk kan også fint kombinerast med ein tur langs Fløtarvegen, eller med rundturen til Hyljås.
