I Åmot finn du fleire sentrumsnære turstiar som gjer det enkelt å kombinere vandring med eit stopp langs E134. Både Groven Camping & Hyttegrend og Hyllandsfoss Camping og Hyttegrend er gode startpunkt for turane i området. Her finn du turstikart, skilta vegar og nyttig informasjon om nærområdet. På Groven finn du også turistinformasjon for området, og fleire av turane ligg ute med gode turbeskrivingar på UT.no.
Turstien Fløtarvegen tek deg med på ei historisk vandring langs Hyllandsfossen, der du går tett på spor etter tømmerfløyting, industri og gamle steinmurar langs elva. Rundt Ormetjønn finn du ei familievenleg rundløype med tilrettelagd badeplass og flytebrygge – eit populært område for både små og store på varme dagar.
For deg som ønskjer litt meir utsikt, er Hyljås ein fin liten rundtur med flott utsyn mot Hyllandshylen og Vehuskjerringa. Eit anna sentrumsnært alternativ er Kappelnuten, eit lett tilgjengeleg utkikkspunkt med utsyn over Åmot og landskapet rundt.
Åmot er også ein god base dersom du ønskjer å utforske meir av Fjell-Telemark. Med sentral plassering i Vinje har du gode utgangspunkt for større turmål som Lårdalstigen, Rui, Falkeriset og Gaustatoppen.
Velkomen vandrar!
